ALMAGTIGE

ALMAGTIGE is ’n naam vir God en ’n vertaling van die Hebreeuse* woord sjaddai, wat dikwels in die frase ’el sjaddai (“God, die Almagtige”) voorkom. Die Griekse* vertaling (pantokrátōr) en Latyn (omnipotens) dui beide op almag of een wat almagtig is. Meer as die helfte van die kere wat dié naam vir God in die Ou Testament* gebruik word, is in die boek Job* (31 uit 48 keer). Sowel Job as sy gespreksgenote verwys dikwels na God as sjaddai. Genesis* is die enigste ander Ou-Testamentiese boek waarin dié naam veelvuldig voorkom. In die verhale van die aartsvaders* is dit soms God wat Homself só voorstel: “Ek is ‘el sjaddai” (aan Abraham* – Gen 17:1), soms is dit hoe daar na Hom verwys word: “‘el sjaddai sal jou seën” (Isak* aan Jakob* – Gen 28:3). In die Jakob-verhale is daar nog vier verwysings na ‘el sjaddai, óf in verband met Josef*, óf met Bet-El*. In Num 24:4 en 16 profeteer Bileam* twee keer “wat sjaddai hom laat sien”. Jes 13:6 en Joël 1:15 bevat byna identiese uitsprake oor die dag* van die Here*: “… dit bring verwoesting, dit kom van die Almagtige af.” Die Godsnaam sjaddai word ook in Eksodus* en Rut*, in twee psalms en in Esegiël gebruik, meestal in digvorm.

 

Sidebar