BARABBAS

BARABBAS. Tydens Jesus* se verhoor vra Pilatus* wie hy moet vrylaat, Jesus Barab­bas of Jesus Christus* (Matt 27:16-17). Hoe­wel die gebruik om ’n gevangene tydens Paasfees* vry te laat, nie buite die Evange­lies* bekend is nie, is daar geen rede om aan die historisiteit daarvan te twyfel nie. “Jesus” was ’n algemene naam in daardie tyd. Jesus Barabbas, ’n berugte gevangene (Matt 27:16), het tydens ’n opstand moord gepleeg (Mark 15:7). Hy word ook ’n “rower” genoem (Luk 23:19; Joh 18:40). Josefus* gebruik dieselfde woord vir “vryheidsvegters”. Barabbas beteken “seun van Abba” of “seun van die vader”. In die beste manu­skripte van Matt 27:16 ontbreek “Jesus” as “voornaam” saam met Barabbas. Origenes* (200 nC) ken dié tekslesing, maar aanvaar dit nie omdat nêrens in die Bybel* ’n sondaar “Jesus” genoem word nie. Waarskynlik was die lesing “Jesus” by Barabbas in die beste teks aanwesig, maar is dit later uit eerbied weggelaat.

Pär Lagerkvist*, Sweedse skrywer, se roman, Barabbas, wat die aard van goed en kwaad, én van geloof, met ’n verbeelde Barabbas as hoofkarakter ondersoek, is in 1952 met die Nobelprys vir Letterkunde bekroon.

 

Sidebar