BROWNLEE, JOHN

BROWNLEE, JOHN (1791–1871) is in Skotland gebore. Hy het lid van die Lon­dense Sendinggenootskap* (LSG) geword. In 1817 het hy in die geselskap van Robert Moffat*, ook ’n sendeling* van die LSG, in Kaapstad aangekom. Hy het eers naby Swellendam gewerk waar hy met ’n Suid-Afrikaanse meisie, Catherine de Jager, getroud is. Toe Joseph Williams, sendeling* onder die Xhosas*, oorlede is, het Lord Charles Somerset besluit dat die sendeling wat sy pos sou oorneem, ook as agent vir die regering sou werk. Brownlee is die pos aangebied en hy het dit aanvaar. Hy het in 1820 in die Tyume-vallei begin werk, maar in 1825 het hy weer by die LSG aangemeld en ’n sen­dingstasie naby die Buffelsrivier onder die Tzatzoe-mense gestig. Dit was die begin van King Williamstown in die Oos-Kaap.

Hy het tydens twee grensoorloë in die sendingveld gebly en het saam met FG Kayser, ook ’n sendeling, ’n vertaling van die Nuwe Testament* gedoen wat nooit uitgegee is nie. Hy het later, in 1836, lid van die Glasgow-Sendinggenootskap geword. Hy het in 1867 afgetree en is in 1871 in King Williamstown oorlede.

Vir verdere lees: Standard Encyclopedia of Southern Africa Vol 2, bl 539. Kaapstad: Nassau.

Sidebar