DIE STEM (VAN SUID-AFRIKA)

DIE STEM (VAN SUID-AFRIKA) was tot 1994 saam met The Call of South Africa die amptelike Volkslied (of Nasionale Lied) van die Republiek van Suid-Afrika en vóór 1961 dié van die Unie van Suid-Afrika.

CJ Langenhoven* het die woorde van die eerste drie strofes van Die Stem op 31 Mei 1918 in sy huis, Arbeidsgenot, op Oudtshoorn geskryf. Dit word in Julie 1918 in De Burger gepubliseer onder die skuilnaam KRN, en ná ’n versoek van ’n leser, skryf Langenhoven ’n vierde strofe met ’n godsdienstige inslag daarby. Ds ML de Villiers, ’n predikant van die NG Kerk*, komponeer die musiek in 1919 in sy pastorie in Simonstad.

Die Stem van Suid-Afrika word op 31 Mei 1928 die eerste keer in die openbaar gesing toe die destydse landsvlag die eerste keer amptelik gehys is, maar dit word eers byna 29 jaar later, op 2 Mei 1957, as Suid-Afrika se amptelike Volkslied aanvaar. Die Engelse weergawe, The Call of South Africa, is in 1957 vir amptelike gebruik goedgekeur. Met republiekwording in 1961 is die twee weergawes as amptelike Volkslied van die Republiek van Suid-Afrika aanvaar. Frases van albei is in die amptelike Nasionale Lied van die demokratiese Suid-Afrika, Nkosi sikilel’ iAfrika* (“God seën Afrika”), opgeneem.

Sidebar