EERSTE BEGINSELS

EERSTE BEGINSELS. In die Griekse filo­so­fie* is hierdie uitdrukking gebruik om te verwys na die vier basiese elemente: grond, lug, vuur en water. Volgens die des­tydse beskouing het alles uit dié vier elemente bestaan. Die Nuwe Testament* gebruik die uitdrukking egter op ’n ander manier. In Gal 4:3 en 4:9 praat Paulus* van die “eerste beginsels van die wêreld” (1933/1953-Afrikaanse vertaling; 1983-Afrikaanse vertaling: “wettiese godsdienstige reëls”) as hy neerhalend verwys na enige soort gods­diens* (Joods* of heidens*) wat van mense geestelike slawe (Kyk by: Slaaf) maak. Daarteenoor be­klemtoon hy dat Christus* mense vrygemaak het van enige vorm van geestelike slawerny. In Kol 2:8, 20 word hierdie uitdrukking weer gebruik. Kenners verstaan dit gewoonlik op een van twee maniere: 1. Basiese menslike leerstellings en reëls waaraan mense verkeerdelik vashou; 2. Sterk geestelike magte* wat volgens die destydse beskouing in beheer van die wêreld was en volgens wie se beginsels sommige mense probeer leef het. Die gelowiges in Kolosse* word egter opgeroep om anders te leef: omdat hulle saam met Christus gesterf het, is hulle dood* vir die “eerste beginsels van die wêreld” (Kol 2:20). In Heb 5:12 word ook gepraat van “eerste beginsels” (1933/1953), maar dan word die basiese grondwaarhede van die Christelike geloof bedoel (soos die 1983-vertaling dit vertaal).           ^^^ ^^^1

Sidebar