GORDON, ERNEST

GORDON, ERNEST (1917–2002). Pierre Boulle se roman, The Bridge on the River Kwai, en die epiese rolprent wat daarop gebaseer is, het die aandag gevestig op die onmenslike wreedhede waaraan die Japanners die geallieerde krygsgevangenes by Tjoenkai, Birma, onderwerp het, asook op die durf en deursettingsvermoë van die krygsgevangenes. Min ophef is egter gemaak van die groot geestelike herlewing wat daar in hierdie tyd plaasgevind het.

Gordon is in Dunoon, Skotland, gebore. Aan die begin van die Tweede Wêreldoor­log* was hy ’n ingeskrewe student aan die Universiteit van St Andrews. Hy het by die lugmag aangesluit en uiteindelik die rang van kaptein beklee. Ná die val van Singa­poer is hy deur die Japanners gevang terwyl hy van Sumatra gevlug het. In die kamp langs die Kwairivier het hy by die dood omgedraai. Deur die onbaatsugtige liefdesdiens van Dusty Miller, ’n Metodis*, en Dennis (Dinty) Moore, ’n Katoliek*, het hy langsamerhand herstel. Saam was hierdie driemanskap die katalisator vir ’n geestelike herlewing wat deur die kamp met sy duisende krygsgevangenes versprei het. Daar is ook ’n film, To End All Wars, van Gordon se oorlogservarings gemaak.

Ná die oorlog het Gordon in Edinburgh teologie* bestudeer en predikant* van Paisley Abdy (’n Skotse presbiteriaanse* kerk) geword. In 1955 is hy na Amerika waar hy studenteleraar in Princeton geword het. Ná sy aftrede in 1981 het hy president van die Christian Rescue Effort for the Emancipa­tion of Dissidents geword wat hulle beywer het om dissidente* uit die tronke in Oos­bloklande te kry.

Vir verdere lees: Ernest Gordon 1963. Miracle on the River Kwai. Londen: Wm Collins.

Sidebar