GOUE REËL

GOUE REËL. Dié woorde van Jesus* staan bekend as “die goue reël”: “Alles wat julle wil hê dat die mense aan julle moet doen, moet julle ook aan hulle doen. Dit is tog waarop dit neerkom in die wet en die profete” (Matt 7:12). In Luk 6:31 lui dit: “Behandel ander mense soos julle self behandel wil word”. Terwyl Matteus* op Joodse* lesers gerig is, is Lukas* se teikengroep mense van Griekse afkoms. Daarom laat hy die verwysing na die Ou Testament* (“die wet en die profete”) weg.

Hierdie uitspraak is nie uniek aan Jesus soos dikwels gemeen word nie. Die Joodse verklaarder van die tora*, rabbi* Hillel* (ongeveer 20 vC), het dit bv in ’n antwoord aan ’n heiden só gebruik: “Moe­nie aan ander doen wat vir jou na seermaak lyk nie, dit is die hele tora. Die res is bloot kommentaar. Gaan en leer dit.” In die Joodse diaspora* was meer positief gestelde weergawes (soos Jesus s’n) ook in omloop, soos ook in ander godsdienste.

Samevattings van dele van die tora is dikwels deur die Joodse rabbi’s gemaak. Dit is ter wille van die onthou gedoen, en nie soos by Jesus om prioriteite te stel nie (L Goppelt). Jesus se positiewe uiteensetting is in ooreenstemming met sy aanmoediging tot daadwerklike liefde* elders in die Evan­gelies*. Dit hang saam met die eiesoortige motief vir etiese* optrede by Jesus (Kyk by: Bergrede).

Vir verdere lees: DE de Villiers 1978. Die eiesoortigheid van die Christelike moraal. Amsterdam: Rodopi.

Sidebar