JONES, MARY

JONES, MARY (1784–1866) is in Llanfi­hangel-y-Pennant, nou deel van Gwynedd in Wallis, gebore. Haar pa was ’n arm we­wer. Hy en sy vrou kon nie lees nie, en daarom het hulle ook nie boeke gehad nie – selfs nie ’n Bybel* nie. Mary Jones is eers op 10 jaar skool toe.

Ene mev Evans, wat naby hulle gewoon het, het Jones belowe dat, so gou as wat sy kon lees, sy na haar huis kon kom om uit haar Bybel te lees. So het dit ook gebeur. Toe Mary die aand huis toe gaan, het sy net een wens gehad: sy wou so graag haar eie Bybel hê. Haar pa het vir haar ’n spaarbussie van hout gemaak waarin sy haar spaargeld gebêre het. Ná ses jaar het sy genoeg geld vir haar eie Bybel gehad.

Die enigste beskikbare Bybels was in Bala – 45 km daarvandaan. Sy besluit om daar­heen te loop. Toe sy daar by eerw Tho­mas Charles kom, sê hy: “Kind, ek is jammer, maar ek het net een Bybel hier, en ek het dit aan iemand anders belowe.” Maar omdat hy so jammer vir haar gevoel het, het hy dit vir haar gegee.

By die huis maak Jones vir die eerste keer die Bybel in haar eie taal oop en lees Ps 150.

Eerw Charles het tydens ’n byeenkoms in Londen vertel hoe min Bybels daar in Wallis is – en ook van Jones se storie. Daar is toe begin om plan te maak sodat die mense in Wallis meer Bybels kon kry wat ook nie te duur is nie. Die een predikant sê toe daar moet ’n vereniging gestig word om vir Wallis Bybels te gee. ’n Ander een, Joseph Hughes, voeg by: “Nie net vir Wallis nie, maar vir die hele wêreld!” So is die Britse en Buitelandse Bybelgenootskap op 7 Maart 1804 gestig. (Kyk ook: Bybelgenoot­skappe*, en: Bybelvertaling en -versprei­ding*.)

Sidebar