LIVINGSTONE, DAVID

LIVINGSTONE, DAVID (1813–1873), een van die bekendste Britse sendelinge* en ontdekkingsreisigers*, is in Skotland gebore. Ná sy bekering* was hy oortuig dat hy ’n sending*roeping het, en daarom het hy medies en teologie* gestudeer. Tussen 1841 en 1856 het hy as sendeling van die Lon­dense Sendinggenootskap (LSG)* in Suid-Afrika gewerk. Sy eerste aanstelling was in Kuruman onder Robert Moffat*, met wie se dogter Livingstone later getrou het. Living­stone het gou goeie betrekkings met die plaaslike bevolking opgebou en op dié manier heelwat kennis opgedoen oor die mense, die geografie en die slawehandel. Hy het verskeie reise oor Afrika* aangepak, onder meer ’n staptog oor die kontinent van oos na wes. Toe die LSG nie meer oortuig was van die nut van sy reise vir die sending nie, het Livingstone sy ontdek­kingstogte in opdrag van die Britse regering voortgesit. Hy is in 1873 by Chitambo (in die huidige Zambië) oorlede. Vrae kan wel oor Livingstone se eie sendingwerk gestel word, maar ten spyte van sy tekortkomings het God hom gebruik om die wêreld se aandag op die nood van Afrika te vestig. Dit het hy veral gedoen deur die “oop seer van Afrika”, die Arabiese slawe*handel, bloot te lê.

Livingstone is waarskynlik meer bekend vanweë Stanley se uitspraak: “Dr Living­stone, I presume.” In 1866 het Livingstone na Tanzanië vertrek op soek na die oorsprong van die Nyl*. Hy het egter siek geword en niemand het geweet waar hy hom bevind het nie. Net een van die 44 briewe wat hy in hierdie tyd geskryf het, het by Zanzibar uitgekom. In 1869 het die New York Herald met die oog op ’n bietjie publisiteit vir Henry Stanley gevra om na Livingstone te gaan soek. Hy het hom in Oktober 1871 by Ujiji langs die Tanganji­kameer gekry en die bekende groetwoorde gesê.

Vir verdere lees: RA Tucker 1983. From Jerusalem to Irian Jaya. Grand Rapids: Zondervan.

Sidebar