MAAGD

MAAGD verwys na ’n vrou* wat nog nie seks gehad het nie. In die Ou Testament* moes ’n bruid* by voorkeur ’n maagd wees (Deut 22:13-21). Die straf vir die verkragting van ’n verloofde maagd, was steniging*. As die maagd nie verloof was nie, moes die verkragter die bruidsprys betaal en met haar trou (Deut 22:23-29; Eks 22:16-17). Priesters*1 kon net met ’n maagd of die weduwee van ’n priester trou (Lev 21:13-15; Eseg 44:22). Maagdelikheid was simbolies van God se dogter of bruid en is meta­fo­ries* vir Jerusalem* of Israel* gebruik.

In die Nuwe Testament* het Paulus* met die oog op die eindtyd* maagdelikheid ge­prys, maar nie vereis nie (1 Kor 7:25-38). Vol­gens Paulus is die kerk* ’n suiwer, maagdelike bruid (2 Kor 11:2; Ef 5:27). Die martelaars in Op 14:4 is mans wat nog nie seks gehad het nie.

In die 1983-Afrikaanse Vertaling word die Hebreeu­se* en Griekse* woorde vir “maagd” verskillend vertaal: maagd, jongmeisie, meisie, jong vrou, vrou en selfs ongetroude. In verband met Maria* as maagd: Kyk by: Maag­delike geboorte.

Sidebar