MAGTE

MAGTE is byna ’n tegniese term in Pau­lus* se briewe* wanneer hy dit stel dat Christus* die “bose* magte ontwapen het” (Kol 2:15), “hoog bo alle bose magte en enige vorm van gesag” gesetel is (Ef 1:21) en by die einde die koningskap* aan die Va­der* sal oordra, “nadat Hy alle bose mag­te vernietig het” (1 Kor 15:24). (Volgens die 1983-Afrikaanse Vertaling. Die 2014-Direkte Vertaling vermy die woord “bose” in genoemde gevalle. Efesiërs 1:21 lui in dié vertaling bv: “ bo elke owerheid en gesag en heerser, ja, bo enigiets wat genoem kan word, nie alleen in hierdie bedeling nie, maar ook in die toekomstige”.)

Ná die Tweede Wêreldoorlog* verstaan Cullmann* die magte as geestelike en poli­tieke* magte (Rom 13 en 1 Kor 2:6-8), en sien hy dit in beide goeie en slegte politieke stelsels. H Berkhof* ontmitologiseer* ook so die magte: Dit is nie bose geeste nie, maar wel onsigbare en soms anonieme strukture wat die menslike bestaan beheer, bv tradisie*, armoede*, wet en orde. Stoicheia, archai, exousiai, dunamai verwys by Paulus – soos by Grieks*sprekende den­kers van sy tyd – na werklike, onsigbare, geestelike magte. Horsley (1997), Haarink (2003) en Crossan (2004) se politieke uitleg oordeel dat Paulus se bediening en veral sy verkondiging van Jesus* as die kurios (Here*), gesien moet word in die konteks van die alomteenwoordige mag van die Romeinse staat en die keiser* se aanspraak op die titel kurios. (Kyk by: Romeinse Ryk.) Daarom kan dit be­swaar­lik ontken word dat “die magte” ’n sosio-politieke dimensie gehad het. Wink bied ons ’n bruikbare middeweg tussen hierdie uitlegte. Volgens hom gebruik Paulus doelbewus dubbelsinnige begrippe wanneer hy woorde soos stoicheia en archai gebruik, om daarmee na “beide die innerlike en uiterlike manifestasies van mag” te verwys.

Vir verdere lees: H Berkhof 1977. Christ and the Powers. Scottdale: Herald. JD Crossan en JL Reed 2004. In Search of Paul: How Jesus’s Apostle Opposed Rome’s Empire with God’s Kingdom. New York: Harper Collins. D Haarink 2003. Paul among the Postliberals. Grand Rapids: Brazos. R Horsley (red) 1997. Paul and Empire: Religion and Power in Roman Imperial Society. Harrisburg: Trinity.

 

Sidebar