OOSTHUYSEN, JACOBUS CHRISTIAAN (KOOS)

OOSTHUYSEN, JACOBUS CHRISTIAAN (KOOS) (1933–) is op Port St Johns, Transkei, gebore as die seun van dr Koot Oosthuysen en Gertruida, gebore Schoon. Hy het aan die universiteite van Stellen­bosch en Yale gestudeer. As vlot isiXhosa-spreker (Kyk by: Xhosas en die Christelike geloof) was hy leraar van verskeie isiXhosa-sprekende gemeentes in die NG Kerk in Afrika* en het in 1994 moderator* van die Kaaplandse sinode van die toe pasgestigte Verenigende Gereformeerde Kerk in Suider-Afrika* geword.

Oosthuysen was deur die jare ten nouste betrokke by die vertaling van die isiXhosa-Bybel*. Van 1974–1995 was hy projekkoördineerder in diens van die Bybelgenootskap van Suid-Afrika*. Hy was behulpsaam met die publikasie van die destydse vertaling in hersiene standaard-ortografie, en daarna het ’n eietydse isiXhosa-vertaling onder sy leiding gevolg. In die plek van die vroeëre letterlike vertaling is nou gesoek na eietydse uitdrukkings om die gedagtes van die Bybelskrywers weer te gee. Byvoorbeeld: In plaas van die leenwoord ankile (anker) in Heb 6:19 om “hoop” te beskryf, staan daar nou intsika (die steunpaal van ’n hut). Oosthuysen is met die vertaalwerk onder andere deur twee Xhosa-leraars, EH Dike en ZWN Nkuhlu, bygestaan. Hy het as Bybelvertaler en kerkleier (hy praat van homself liewer as “fasiliteerder”) in ’n oorgangstyd in die kerk merkwaardige werk gelewer.

In 2012 het die Andrew Murray-prysfonds aan Koos Oosthuysen ’n spesiale toekenning gemaak ter erkenning van onder meer sy Bybelvertalingswerk. En in 2013, kort voor sy 80ste verjaarsdag, het hy ’n doktorsgraad aan die Rhodes-universiteit behaal vir ’n verhandeling getiteld “A critical analysis of the grammar of isiXhosa as used in the Revised Union Version of the Bible (1942/1975)”. Hy het toe aan die Kerkbode gesê: “Ek beplan nou om ’n ou isiXhosa-handleiding in Engels te hersien. Daarna sal ek kyk waarmee ek my gaan besig hou. Ek het al ’n hartomleiding gehad en my kanker is in remissie. Ek dink dus daar wag nog so ’n paar dinge op my” (3 Mei 2013).

Sidebar