OWERSTE (RAADSLID, HOOFMAN).

OWERSTE (RAADSLID, HOOFMAN). ’n Leier of belangrike amptenaar op verskillende terreine is in die tyd van die Nuwe Testament* ’n “owerste”, “raadslid” of “hoofman” genoem. Soms verwys “owerste” of “hoofman” na godsdienstige leiers. In Joh 3:1 word Nikodemus* ’n “owerste van die Jode” (1933/1953-Afrikaanse Vertaling) / “’n lid van die Joodse Raad” (1983-Afrikaanse Vertaling) / “’n leier van die Jode” (2014-Direkte Vertaling) genoem. In Luk 8:41 heet Jaïrus die “owerste van die sinagoge*” (1933/1953) / “raadslid van die sinagoge” (1983) / “’n leier van die sinagoge” (2014). Soms verwys “owerste”/“raadslid” na die burgerlike owerheid. In Matt 20:25 praat Jesus bv van die “owerstes van die nasies” (1933/1953) / “regeerders” (1983) / “heersers” (2014). Kyk ook 1 Kor 2:6, 8. Partykeer word ook van Satan as die “owerste” (1933/1953) / “aan­voerder” (1983) / “heerser” (2014) van die bose geeste/wêreld/demone gepraat (Matt 12:24; Joh 14:30). In Op 1:5 word Christus* die “Owerste oor die ko­nings van die aarde” genoem (1933/1953; “Heerser” 1983, 2014).

Dié begrip word ook binne militêre opset gebruik. In Moses* se tyd was daar bv “aanvoerders” en “owerstes oor duisend/honderd” (Eks 18:21 1933/1953; “bevelvoerders” 1983) in Israel* se leër. In die Nuwe Testament* verwys die begrip ook na leiers binne die Romeinse leër. Kor­nel­ius was bv ’n “hoofman oor honderd” (Hand 10:1 1933/1953; “kaptein” 1983; “hekatontarg” 2014) en Lisias was ’n “owerste oor duisend” (Hand 24:22 1933/1953; “kommandant” 1983; “chiliarg” 2014). Laasgenoemde word soms in 1983 vertaal as “generaal” (Hand 25:23).

 

Sidebar