SALIGMAKER

SALIGMAKER (1933/53-AFRIKAANSE VERTALING), VERLOSSER, REDDER (1983-AFRIKAANSE VERTALING), VERLOSSER (2014-DIREKTE VERTALING) is ’n Griekse term (soter) wat in die antieke tyd vir belangrike mense, heersers en gode gebruik is. In die Ou Testament* word God beskryf as sy volk se Verlosser (Jes 60:16). Net God kan mense red, mense kan nie. In Hebreeus* is “verlosser” ’n werkwoordvorm, nie ’n naamwoord nie, wat aandui dat die term eerder ’n beskrywing is van God se dade ten behoewe van sy volk as wat dit ’n titel is.

“Verlosser” is algemeen gebruik as ’n titel vir die Griekse gode, asook vir magtiges, heersers en selfs filosowe* (Epikurus). Sedert Nero* se tyd is dit ook vir Romeinse keisers* gebruik. In die Nuwe Testament* word “verlosser” slegs vir God en Jesus* gebruik. God is Verlosser omdat Hy die oorsprong van verlossing is wat sy Seun bewerk (Luk 1:47, 68-69).Van die begin af word Jesus aangekondig as die Verlosser (Luk 2:11). Jesus het ook self sy sending as verlossing gekenmerk (Luk 19:10). Die term veronderstel ’n toestand van gevaar waaruit mense verlos moet word. Hoewel God mense uit verskillende gevaarsituasies verlos, sê beide die Ou en Nuwe Testament dat sonde* die ergste gevaar is waarin die mens kan verkeer. Alle mense het daarom behoefte aan verlossing – armes, rykes, magtiges, selfs hulle wat die wet* ken (Rom 3:23-24).

 

Sidebar