SILAS

SILAS was ’n leier in die eerste Christelike gemeente* in Jerusalem* en was hoog geag onder die Christengelowiges. Hy word saam met Paulus*, Barnabas* en Judas Barsabbas* deur die gemeente* in Jerusalem na Antiogië* gestuur om die besluite van die sinode* oor te dra en die nie-Joodse gelowiges daar te verwelkom (Hand 15:22). Hy was ’n profeet* en begaafde spreker wat die gelowiges in Antiogië bemoedig en versterk het (Hand 15:32). Hier help hy vir Paulus met sy sendingwerk. Ná ’n woordewisseling tussen Paulus en Barnabas oor Johannes Markus*, kies Paulus vir Silas as sy reisgenoot op sy tweede sending*reis (Hand 15:36-41). Silas vervang waarskynlik vir Markus, wat ’n ondergeskikte rol gehad het, eerder as vir Barnabas wat self as ’n “apostel*” beskou is (Hand 14:14). Markus was moontlik ’n dienaar* van die apostels, soortgelyk aan die amptenare van die sinagoge* (Luk 4:20) wat na die Skrifte en kategetiese dokumente omgesien het. As Silas ’n soortgelyke taak gehad het, verklaar dit die literêre rol wat hy in die Nuwe-Testamentiese* brief*literatuur speel. Hy vergesel Paulus deur Sirië, Klein-Asië*, Masedonië* en Tessalonika*. In Filippi* is Paulus en Silas in die tronk gegooi omdat hulle die evangelie* verkondig het (Hand 16:21). Hier bid en sing hulle liedere wanneer ’n aardbewing die tronkdeure laat oopgaan. Silas en Timoteus* bly in Berea agter wanneer Paulus na Atene* vertrek (Hand 17:14), maar Silas sluit weer later by Paulus in Korinte* aan (Hand 18:1-5).

“Silas” (Grieks*) en “Silvanus” (Latyn) (Hand 18:5; 2 Kor 1:19; 1 Tess 1:1; 2 Tess 1:1; 1 Pet 5:12), is waarskynlik dieselfde persoon. Hy was moontlik ’n Romeinse burger (Hand 16:37-39; Kyk by: Romeinse Ryk) met Grieks as moedertaal. Met sy hulp word 1 Petrus* geskryf (1 Pet 5:12) – wat die taalooreenkomste in 1 Petrus, 1 en 2 Tessalonisense en die Aposteldekreet van Hand 15 sou kon verklaar.

 

Sidebar