SIONSGESANGE

SIONSGESANGE. Die eerste Sionsgesangebundel het 402 selfstandige bewerkings van psalms, gesange en liedere uit Nederlandse, Engelse en Duitse bronne bevat. Dit is in 1946 amptelik as sangbundel van die NG Sendingkerk* aanvaar. Pastor E Hartwig, leraar van die Rynse Sendinggemeente op Carnarvon, het langer as tien jaar daaraan gewerk.

Opeenvolgende Gesangboekkommissies het aan die hersiening daarvan aandag gegee, totdat die proefbundel Nuwe Sionsgesange (1990) deur die sinode* aanvaar en die Nuwe Sionsgesangboek as liedboek van die Verenigende Gereformeerde Kerk* in Suider-Afrika in 1994 verskyn het.

’n Groot aantal liedere stem in inhoud en melodie ooreen met die sangbundel van die NG Kerk*. Daar is ’n twintigtal Engelse liedere, asook liedere wat nuut gedig of waarvan die melodieë gekomponeer is deur lidmate* van die kerk.

Die boek was die werk van ’n kommissie bestaande uit di Roelf Herholdt (SA Gestig), SA Davis (Vredendal), CP du Toit (Wagenmakersvallei), GE Hugo (Windhoek) en RJ Neveling (Hopetown).

In die lig van die eenwordingsproses van die NG Sendingkerk en NG Kerk in Afrika* (NGKA), wou sommige die publikasie van die Nuwe Sionsgesange terughou. As gevolg van taalverskille is egter besluit om die bundel náás die Hosanna van die NGKA as amptelike liedboek binne die VGKSA te gebruik.

 

Sidebar