SJINTOÏSME

SJINTOÏSME. Sjinto, die tradisionele geloofstelsel van Japan, het geen fundamentele belydenisse nie, maar balanseer tussen geweldige respek vir die Japannese kultuur en die onsigbare teenwoordigheid van onnoembare geestelike magte, of kami. Sjinto is die Japannese letters vir kami en weg en beteken dus die weg van en tot die gode. Kami beteken nie noodwendig “god” of “goddelik” nie. Kami kan ook menslik wees en daar is geen maklike onderskeid tussen wat lewend en nie-lewend, kultureel en natuurlik, menslik en goddelik is nie. Sekere indiwidue met baie charisma of buitengewone sukses, kan ook kami heet. Alle dinge is saamgebind tot ’n geestelike familie en daarom word daar altyd probeer om tegelyk geestelik, materieel en wetenskaplik na die lewe te kyk. Kami is onsigbaar en ontelbaar. Sommige kami word met die kombuis of veiligheid op die pad geïdentifiseer, terwyl ander met plekke (spesifiek woude, berge en watervalle) en misterieuse kragte soos die wind of donderweer verbind word. Indiwidue onthaal kami om hulle goeie wil te betoon.

Reinheid is ’n voorwaarde vir die regte verhouding tot kami, asook die vermyding van mislukking en siekte. Reinheid, eerlikheid (makoto) en beleefdheid in die besonder, is bewyse daarvan dat jy vry is van slegte magte en invloede.

Daar is geen lering oor die oorsprong van die kosmos*, die toekoms, finale oordeel of lewe na die dood* nie. Sjinto is eerder ’n stel rituele om met kami in verhouding te tree. Plaaslike feeste (matsuri) het deur die eeue so deel van die Japannese sosiale lewe geword en is so ingeweef in tradisionele Japannese moraliteit en sosiale gedrag, dat deelname aan Sjinto ’n vanselfsprekende aspek van omtrent alle Japannese se lewe is. Sjinto is in die geskiedenis daarom dikwels deur die staat gebruik om die volk onder die politieke heerser van die dag te verenig.

 

Sidebar