TEKS

TEKS verwys populêr na ’n Bybelvers of die gedeelte van die Bybel* wat gelees word en waaruit daar tydens ’n erediens* of by ’n ander geleentheid gepreek/gepraat word.

As ’n tegniese term verwys dit na die Bybel in die oorspronklike tale waarin dit geskryf is: Hebreeus* en Aramees* vir die Ou Testament* en Grieks* vir die Nuwe Testament*. Die oorspronklike manuskrip­te van die Bybelboeke, die outografa*, bestaan lank nie meer nie, en die tekste is met die hand oorgeskryf tot met die uitvinding van die boekdrukkuns. In die proses van oorskryf het talle veranderings inge­sluip in die vorm van redaksionele wysi­gings, skryffoute en byvoegings of wegla­tings. Nadat die belangrikheid van die teks­te as gesaghebbende bronne vir die kerk* besef is, het die oorskryf van die tekste met groter noukeurigheid plaasgevind. Die Hebreeuse teks wat as basis dien vir mo­derne vertalings van die Ou Testament, is die masoretiese teks (Kyk by: Masorete) wat deur Joodse geleerdes bewaar is en uit die 10de eeu dateer. Daar bestaan talle antieke manuskripte van die Griekse teks van die Nuwe Testament wat dit die bes bewaarde antieke geskrif maak. In die eerste eeu van oorlewering het die meeste variante op die teks ontstaan. Die wetenskap van tekskritiek* probeer om die beste teks daar te stel op grond waarvan Bybel­vertalings en wetenskaplike ondersoek van die Bybel gedoen kan word.        

Sidebar