TYNDALE, WILLIAM

TYNDALE, WILLIAM (circa 1495-1536) is in Gloucestershire gebore en het aan die universiteite Oxford en Cambridge ge­studeer. Hy was ’n onafhanklike denker wat ’n eenvoudige bestaan gevoer en nie gewild­heid nagejaag het nie. Hy het ’n talent vir taal gehad. Sy beskermheer was Humphrey Monmouth, ’n handelaar, wie se medehandelaars – die Christian Brethren – Prote­stantse* leesstof uit Europa ingevoer het. Tyndale het in 1526 in Antwerpen die Protestantse Nuwe Testament* gepubliseer wat hy in die spreektaal vertaal het. Dit het Luther* se vroeë idees verkondig en was op Erasmus* se Griekse weergawe gebaseer. Hy het geglo dat die Bybel* die bron van gesag vir die kerk* se leer*, instellings en seremonies is. In 1530 het hy die Pentateug* vertaal gehad, waarin hy die wet* sterker as die evangelie* beklemtoon het. In sy Obe­dience of a Christian Man (1528) het Tyndale die leerstelling van Godgewilde koningskap gesteun. In 1535, net toe hy die veiligheid van English House in Antwerpen verlaat, het soldate van die Raad van Brussel hom gevange geneem. Ná verskeie uitgerekte twisgedinge is hy as ketter* ver­oordeel en in 1536 doodgemaak. Sy werk is afgesluit met die publikasie van die Matteus*-Bybel. Tyndale se grootste be­skermling was Miles Coverdale, wat sy vertaalwerk voortgesit en toesig gehou het oor die saamstel van die sg Great Bible – ’n hersiene weergawe van die Mat­teus-Bybel en die eerste volledige Bybel in Engels. Tyndale se werk het alle daaropvolgende Engelse Bybelvertalings beinvloed, tot vandag toe. Een van die organisasies wat met Bybelvertaling* te doen het, is na hom vernoem.

 

Sidebar