WYLANDT, WILLEM BARENTZ (OON)

WYLANDT, WILLEM BARENTZ(OON) (?–?) was pas tot die amp van sieketrooster* toegelaat, toe hy hom op die Drommedaris in die geselskap van Jan van Riebeeck* bevind het wat op 16 April 1652 Tafelberg die eerste keer aanskou het. Hy was ’n Groninger en familielid van Van Riebeeck. Tussen sy aanmelding en aanstelling moes hy hom eers in musiek bekwaam voordat hy toegelaat is. Sieketroosters het verskillende benamings gehad en is op skepe voorlesers genoem. Hulle werk was geestelik van aard en by een geleentheid is Jacob Mattheus vir ’n kort periode die reg gegee om die doop* by hoë uitsondering te bedien. Predikante* het die Kaap aan die beginjare van die vesti­ging maar sporadies besoek en daarom het Wylant en drie ander sieketroosters die Woord* van God aan die Kaap bedien. Hy het die eerste pa geword vir wie ’n wit kind aan die Kaap in die fort op 6 Junie 1652 gebore is. Wylandt doen op 20 April 1655 verslag aan die Klassis van Amsterdam en die Here Sewentien. Hierdie verslag is ’n pragtige voorbeeld van 17de-eeuse Neder­lands, wat byna as Afrikaans* aandoen.

Op 10 Maart 1656 het hy op die jag Weesp na Batavia vertrek om daar diens te doen. In Batavia versoek hy om na Melacca te gaan en op 8 Junie 1657 vertrek hy op die Princes Royael daarheen. Hy het moontlik die res van sy lewe daar diens gedoen.

 

Sidebar